- Әтисез беренче яз. Быел аңа 50 яшь тулган булыр иде. Тик булмады. Шул уйлар күңелне хаман да тырнап тора.
Ничә генә ай узмасын, вакыт дәваламый, йөрәк әрнеүләре сүрелми. Иртән уянгач та өмет белән күзләремне ачам. Ник соң бу ямьсез төш кенә булмады?! Бер дә ышанасы, килешәсе килми. Күккә карап, “Сез ялгыштыгыз!” – дип кычкырасы килә кайчак. Дөрес түгел бу!


Әтиемнең туган көнен бер дә бәйрәм иткәне булмады. Иртән торып котлаулар сибелгәч кенә туган көне икәне хәтеренә төшә иде. Соңгы туган көнендә кафеда утырды. Юк, бәйрәм итеп түгел! Тамагы ачкан да, ашарга дип кергән. Шунда мин: “Әти, киләсе елны синең – юбилей, әйдә бер генә тапкыр булса да билгеләп үтик”, - дидем. Ул шундук җавап бирә: “Буламы соң, кит!”. Әмма мин аны ризалаштырдым. Тик булмады.

Фото-видеоязмалары бераз гына булса да күңелемә якты нур сибә. Оештыручылар әтиемнең туган көне уңаеннан концерт ясыйк дигәч, бик сөендем. 5 апрельне дулкынланып көтәм. Әйтерсең, әти белән очрашырга барам. Эндәшмәсә дә, кулыма кагылмаса да, мин беләм, ул – янымда. Һәрвакыттагыча, нәрсә генә эшләсәм дә, мине яклап тора...

Зоя СОЛОШИНА
Шәһри Казан

Илфак Шиһаповның кызы Зәринә: «Дөрес түгел бу!»

Тулысынча укырга


- Күптән түгел сәер хәлгә тарыдым. Кич. Йоклар алдыннан, гадәттәгечә, шкафтан мендәрләрне алдым, урын җәйдем.

Йоклап китә алмыйм. Мендәрне әйләндереп, уңайлырак итеп ятырга булдым. Һәм шулчак мендәрдән әнинең исе килде. Дөресерәге, аның хушбуеның исе.


DKNY духие, әни аны «яшел алма» дип йөртә иде. Элек ул безгә кунакка килеп киткәч шул ис кала иде. Ə бит соңгы тапкыр килгәненә күпме вакыт үтте, аннары, мендәр тышлары да бер генә кат юылмады. Юк, мине акылдан шашкан димәгез! Уйга чумдым: бәлки ул минем янга әле дә куна киләдер?!..


Синсез - ярты ел... Беләм, иртәгә төшемә керәчәксең, чөнки алты ай буе айның нәкъ шушы көнендә яныма килеп юатасың. «Яшәргә кирәк, балам»...

Зоя СОЛОШИНА
Шәһри Казан

Хәния Фәрхинең кечкенә кызы - Алсу Биктаһирова: «Юк, мине акылдан шашкан димәгез!»

Тулысынча укырга


Ландыш – татар эстрадасының иң уңган хатын-кызларының берседер. Сәхнәдә бик тәкәббер булып күренсә, тормышта ул үтә гади һәм эш сөючән. Аның “Инстаграм”ын карасаң, “Ничек бар эшкә дә җитешә икән?” – дигән сорау туа. Чөнки ул әле генә Мөнир Рахмаев белән гастрольләрдә йөри, әле генә өйдә балалар белән, аларга тәм-томнар пешерә, аннары карыйсың – съемкаларда...

— Ландыш, ничек барына да җитешәсез?
— Барысы да кешенең үзеннән тора. Теләгең булган очракта үз планнарыңны тормышка ашырырга вакытын да, көчен дә табасың. Ялкаулык кына бар, ә яулый алмаслык үрләр юк! Артист та булырга мөмкин, үрнәк әни дә, яхшы хатын да. Тыныч узган көннәрем дә була, кайчак мәшәкатьләргә бае да... Әмма гаиләмә һәрчак вакыт бүләм: балаларга ботканы һәм иремә иртәнге ашны үзем пешерәм.
 
— Каенана белән килен мөнәсәбәтләре күп очракта кискен торганнары билгеле: бу көнкүрештә дә, әдәбият әсәрләрендә дә, киноларда да чагыла...
— Юк, безнең очракта алай түгел. Каенанам миңа икенче әни кебек, мин аны шулай дип йөртәм дә. Сез аны беләсез, ул — Римма Ибраһимова — җырчы, Татарстанның атказанган артисты, бик акыллы, түзем, юмарт ханым. Миңа калса, хатын-кыз үзенең ирен ярата һәм хөрмәт итә икән, әнисенә карата да шундый ук мөнәсәбәттә булырга тиеш. Ул мине ачуланганын, миңа карата ризасызлык белдергәнен бөтенләй хәтерләмим. Яңа җыр яздырам икән, иң тәүдә аңа тыңлатам, ул эстрадада тәҗрибәле кеше буларак, аннан киңәшләрен сорыйм. Серләремне дә аның белән бүлешәм. Күп очракта үз әнием белмәгән нечкәлекләрне дә аңа сөйләп барам. Безнең дустанә мөнәсәбәтләр белән мин горурланып сөйли алам.
 
— Ландыш, Сезнең фикерегезчә, ни өчен күп гаиләләрдә каенана белән килен арасы “салкын” була?
— Лаеклы ялга чыккан кешенең буш вакыты күбәеп, кирәк түгел нәрсәләр белән кызыксына башлавы белән бәйле дип саный каенанам. Янәсе, барлык бәхәсләр дә эш юклыгыннан интеккәннән туа, ди ул. Килешәм. Каенанам әле дә булса “җимерттереп” эшли, ә әзрәк буш вакыты булса, оныклары янына кунакка килә. Ә аннары, киленнәрнең дә төрлесе була. Түзем булырга, бер-береңне ишетергә һәм тыңлый белергә генә кирәк.

Зоя СОЛОШИНА
Шәһри Казан

Ландыш Нигъмәтҗанова: "Каенанам миңа икенче әни кебек"

Тулысынча укырга


Путин сорау бирүче журналистны бүлдереп: “Мин бер кызның “Путин бай-бай” дип язылган плакат күтәрүен күрдем”, – диде. Шуннан соң аңа журналистлар анда “бай-бай” дип түгел, ә “бабай” дип язылганын әйтте.
Путин үзе дә, ялгышуын аңлап, залдагы атмосферага кушылды һәм: “Олыгая барган саен күзләр дә начаррак күрә башлады”, – дип өстәде. Шуннан соң микрофон Татарстан журналистына бирелде. Ул Илбашына:
 
Тәрҗемә белән авырлыклар булганга күрә, бүген миннән барысы да курка. Бабай русча дедушка дигәнне аңлата. Безнең республикада Сезгә балалар нәкъ менә шулай дип эндәшә. Һәм соравым да балалар һәм телләр белән бәйле. Быел бездә дә, башка төбәкләрдә дә тел мәсьәләсе калкып чыкты. Без бик борчылабыз. Ике-өч елдан соң Сез әлеге мәсьәләне тагын кузгатмассыз микән? – дигән сорау юллады.
 
Путин аның соравына болай дип җавап бирде:
 
Беренчедән, мин бездә милли мәсьәләдә бернинди дә кискенлек юк дип саныйм. Икенчедән, тел белән бәйле мәсьәлә бер нәрсәгә генә юнәлтелгән – Россиянең кайсы җирендә генә яшәсәләр дә, балаларның киләчәк тормышлары өчен тигез шартлар булдыру. Мин Татарстанны яратам, анда минем дусларым да күп. Ләкин татарлар Татарстанда гына яшәми бит. Аларның якынча яртысы Россиянең башка төбәкләрендә яши. Бөтенесенең дә тигез шартлары булырга тиеш, һәм әгәр кешеләр үзләренең милли телләрен белсәләр (мин моны бик мөһим дип саныйм), һәм милләтара аралашу телен (рус телен) начаррак белсәләр, ә алдынгы югары уку йортларында рус телендә укыталар, миңа калса, бу Татарстанда яшәүче балалар өчен начар булыр иде. Кешеләргә үз туган телләрен өйрәнү мөмкинлеген тудырырга кирәк. Татар телен генә түгел, ә башка ил халыкларының телләрен дә.     
 
Исегезгә төшерәбез, әлеге сәгатьләрдә Россия Президенты Владимир Путин журналистлар белән очраша. Быелгы матбугат конференциясе унөченче тапкыр уздырыла. Россия лидеры Россия лидеры беренче тапкыр журналистлар сорауларына дәүләт башлыгы вазыйфасына кандидат буларак җавап бирәчәк.
 
Катнашучылар арасында “Шәһри Казан” газетасы баш мөхәррире Гөлнара Сабирова да бар.

Владимир Путин ТАТАР ТЕЛЕ турындагы сорауга җавап бирде

Тулысынча укырга


Казанның Спорт сараенда иң популяр артист – Элвин Грейның концерты узды. Бию мәйданчыгы да, утыра торган урыннар да шыгрым тулы иде. Өч сәгать буе барган тамашада халык җырчы белән бергә җырлады да, биеде дә.
Ләкин концерт тәмамланып, халык чыгар юлга юнәлгәч, күңелсез хәл килеп чыкты. Бер тамашачы (исемен Ләйсән диделәр) залдан коридорга чыга торган урында күпер ролен үтәүче “басма”дан чыкканда, аска егылып төште. Башы белән егылу сәбәпле, һушын җуйды. Бераздан аңына килде. Соңрак аны “Ашыгыч ярдәм” машинасы хастаханәгә алып китте.
 
- Хәле авыр. Коса. Табиблар әлегә төгәл берни дә әйтмәде, бәлки, баш мие селкенгәндер. Тагын да куркынычрак хәл дә булуы мөмкин, диделәр, - диде Ләйсәннең иптәш кызы.
 
Ә без исә кызның сәламәтлегенә җитди зыян килмәгәндер дип өметләнеп, тизрәк савыгуын теләп калабыз.   
 
Бу очракта җырчының гаебе юк, ләкин шулай да шундый зур залларда концерт куйганда, тамашачыларның куркынычсызлыгы мәсьәләсенә күбрәк игътибар бирелсә иде.

Зөһрә САДЫЙКОВА 
Шәһри Казан



Элвин Грейның концертында “Ашыгыч ярдәм” чакыртырга мәҗбүр булганнар

Тулысынча укырга

“Ник китте? Кая китте” кебек сорауларга нокта куелды: Андрей Малахов “Россия 1” (ВГТРК) каналында “Андрей Малахов. Прямой эфир” дигән тапшыруны алып барачак.
“Мин Беренче каналда сезонны намуслы төстә эшләп бетердем. Миңа “Россия 1” каналыннан чылтыратып, үз программамны булдырырга, үземә үк аның продюсеры булырга тәкъдим иттеләр. Нишләргә, ничек алып барырга, нинди темалар күтәрергә – барысын да үзем хәл итә торган кеше ягъни”, – диде танылган алып баручы.
Малахов сүзләренә караганда, аның күптәннән мөстәкыйль эш итәсе, тыгыз кысалардан чыгасы килгән һәм бу адымга ныклап торып барырга “Пусть говорят” студиясенең алы-шынуы этәргеч биргән.
“Мин өйсез, күнегелгән мохитсез калдым. Үзебезнең ике йөз метрлы урыныбызга мең метрлы яңа урынны күргәч, моның соңгы нокта икәнен, бу ишекне ябып, яңа чор башларга вакыт җиткәнен аңыштым”, – диде ул.
Яңа программа тулысынча аныкы булачак икән: ул аны үзе эфирга эшләп чыгара, үзе алып бара, хезмәткәрләргә акчаны үзе түли һәм табышны да үзе алачак. А.Малахов “Россия 1” каналында шулай ук шимбә көнне дә, Беренче каналдагы “Сегодня вечером” кебек, аерым программа эшләячәк. Аның яңа тапшырулары август азагында эфирга чыга башларга тиеш.

Андрей Малахов: "Мин өйсез калдым..."

Тулысынча укырга




Уңнан беренче — Президентыбыз Рөстәм Миңнехановның улы Искәндәр.
 
«Яңа Гасыр» каналында «Хәбәрләр» тапшыруын алып баручы Гөлназ Гыйниятованың улы Аяз 7нче сыйныфка китте.
 
 
 
Җырчы Ландыш Нигьмәтҗанованың улы Әнвәр 1 сыйныфка китте.
 
 
К.Тинчурин театры артисты Харис Хөснетдинов та кызы Алинәне беренче сыйныфка озатты.
 
 
Җырчы пар Динә һәм Рафаэль Латыйповларның оныклары Хәлил 1 нче сыйныфка китте.
 
 
 
Раяз Фасыйховның кызы Венера 2нче сыйныфка китте.
 
 
Алсу һәм Азат Фазлыевларның уллары Аяз 2 сыйныфка китте.
 
 
Юмор остасы Азат Зариповның улы Аяз шулай ук беренче сыйныфка китте.
 
 
Җырчы, композитор Ринас Әхмәтовның кызы Самира 2 сыйныфка бара.
 
 
Г.Камал театры директоры Илфир Якуповның кызы 3енчегә бара.
 
 
Ә калган балаларны таныйсызмы?
 
 
 
 
 

Танылган шәхесләр балаларын мәктәпкә озата: берсеннән-берсе матур ФОТОЛАР карыйбыз

Тулысынча укырга

Хастаханәдән кайткан чагым. Җәйнең матурлыгына сокланып, саф һава сулармын дип җәяүләп йөрергә чыктым. Барлык тереклек ияләре уянган, агачлар ямь-яшел яфракта утыра. Табигатьнең матурлыгын әллә күрә белмибез, әллә бу вакытлар бик тиз узып китә. Колакларны ярып-ярып сандугачларның сайравы гына да ни тора?!
Шул бәләкәй генә кошчыклардан нинди матур табигый көйләр тезмәсе ишетелә. Уйлап карасаң ышанырлык түгел.
Ә мин тәрәзәдән күзәтәм. Юлдан машиналар узгалап йөри. Кемнәрдер өйләренә кайта, кемдер балалары белән очрашуга ашыгадыр, бәлки. Руль артындагы әтиләрен, ирләрен өйдә түземсезлек белән көтүчеләр күп. Тик менә аны гына көтүче дә, сагынучы да юк инде. Бу егетнең исеме Илнар. Без аның белән хастаханәдә бер бүлмәдә дәваландык. Егет көчле аварияга юлыгып, култык таяклары белән дә көчкә йөри иде.
 
Илнар үзе район үзәгеннән бер унбиш чакрымнар читтәге авылдан. Инде тормышка, яшәешкә карашы тискәре булса да, кайбер вакытларда ачылып үзе турында сөйләп куя иде ул. Хәлле гаиләдә яшәгәннәр. Бер генә малай булганлыктан, яшьтән нәрсә сораса да, шуны әти-әнисе сатып алып, табып биреп торганнар. Дөресен әйткәндә, Илнар үз сүзен сүз итүчән бала булып үскән. Аның кирелекләрен яшь вакытта әти-әнисе бик исәпкә дә алмагандыр. Үсәр, тормышка яраклашыр, үзләренә картлык көнендә караучы булыр дип уйлаганнардыр.
 
Урта мәктәпне тәмамлагач, Илнар алга таба укуын дәвам иттерергә теләмәгән. Тормышта кирәк шул дип машина йөртү таныклыгы гына алган. Армия хезмәтендә дә гади солдат булып хезмәт итүдән ары китмәгән. Яшь вакытында “кыланганнары” эссез узмаган, билгеле.
 
Улларын туры юлдан баручы, ярдәмчел итеп тәрбияләп үстерергә тырышсалар да, барып чыкмаган шул. Үзләренә иң зур терәк, булышчы итеп күрергә теләсәләр дә, Илнарның үз дөньясы булган. “Улым-улым” дип кенә торган Илнарлары ялкау, ярдәм итүнең, эшләүнең нәрсә икәнен дә белмичә үскән. Малайларына нервыланып, аның өчен генә борчылып сәламәтлекләре бик таушала әти-әнисенең, еш авырый башлыйлар.
 
Илнар армиядан кайтып ярты ел беркайда эшләмичә кәеф-сафа гына корып йөргәч, болай да йөрәк чирле әтисе үлеп китә. Ә әнисе “Тәртипкә утырыр, акылына килер” дип улын өйләндерергә уйлый. Килен кеше тиз табыла. Күршеләренә башкалабыздан кайтып йөрүче, үзе белән бер яшьтәге Әминәгә өйләнә ул. Илнарның хатыны да үзе төсле - эш сөймәүчән, күпчелек вакытын телевизор каршында утырып, тырнак буяп, чәч ясатып яшәүче булып чыга.
 
Гомер буена хезмәт белән яшәгән, эш сөйгән әни кешегә боларны күрү бик авыр була. Баштарак улын дөрес юлга чыгарырга бик тырышып карый ул. Шунда гына аңлый әнисе: алар тормыш иптәше белән улларын яшьтән үк дөрес тәрбияләмәгәннәр. Дөрес, моны тану аның үзенә дә бик авыр була. Тик ничек кенә кыен булмасын, кырыс чынбарлык белән килешәсе генә кала.
 
Илнарның сөйләве буенча, соңрак ул эш эзләп Казанга китә. Озакламый бик җиңел кәсепкә керешә - акчага уйный башлый. Шуның өчен көн саен шәһәргә йөри ул. Таксист булып Казанга кеше ташып акча эшләрмен дип, әнисенең җыйган кадәр акчасына машина сатып алырга теләвен белдерә. Улы эшләсен генә - әни кеше барына да әзер. Җыйган акча гына җитмәгәч, анасы пенсионерларга бирелә торган кредит ала.
 
Дөрес, баштарак кеше ташып акча эшли Илнар. Кайбер көннәрдә өйгә күчтәнәчләрен дә күтәреп кайта. Әнисе моңа чиксез куана инде. Ана кешегә улының җылы сүзе белән күчтәнәчкә кыстырып кайткан ярты килограмм конфеты да җитә бит. Ләкин болар барысы да вакытлыча гына була шул.
 
Илнарның хатыны һаман да, эш юклыгын сылтау итеп, беркайда эшләми. Бераздан балага уза һәм бала ялына чыккач, акча алып тору өчен шәһәр тирәсендә берәр эш булмасмы дип, Казанга китеп, шунда югалгалап тора башлый. Әнисе:
 
- Хатыныңа корырак бул! - дип әйткәләсә дә, Илнар бу сүзләргә артык игътибар итми.
 
Үз борчулары хәттин ашкан була чөнки. Акчага уйный торгач, муеннан бурычка чума Илнар. Кайбер көннәрдә өенә кайтыр өчен машинасына ягулык салырга да акчасы калмый. Акрынлап, үзе дә сизмәстән, әҗәт чокырына бата ул. Акчаны тотканда гына җиңел шул.
 
Бурычларын түләр өчен Илнарга кайда да булса эшләргә - акча табарга кирәк була. Ә кайбер кешеләр әҗәтен вакытында кайтармаса, өстәтеп түләтәләр.
 
Хатыны да беркайда эшләмәгәч, өйдә тавыш, гауга чыгып кына тора. Әнисе көннән-көн хәлсезләнә бара, тыныч тормыш бетә аңа.
 
Инде өйгә сирәк кайтып күренгән хатыны, көннәрнең берендә, кыз бала таба. Бу баланы карау мәшәкате дә тулысынча Илнарның әнисе өстенә төшә. Чөнки хатыны бала үстерергә әзер булмаганлыгын белдерә. Кайбер вакытларда хәтта сәгатьләр буена баласы янына килеп тә карамый ул. Инде Илнар шикләнә башлый - ул бала әллә аныкы, әллә чит кешенеке...
 
Берсендә, Илнар шәһәрдә “эштә” вакытта, хатыны шылтыратып үзенең шәһәргә китәчәген, ә баланы аның әнисендә калдыраячагын әйтә. Ни дип әйтергә дә, кая барып хатынын эзләргә дә белми ир, ә телефонын гомумән сүндереп үк куйган була. Җитмәсә әнисе дә бик еш авырый бит.
 
Шулай авырлык белән булса да өч ай уза. Әҗәтләрен сорап газаплый башлагач, Илнар акчага уйнавын туктата да бит, тик бик соңга калып кына ясый бу адымны.
 
Берсендә, соңлап кына Казаннан кайтып килгәндә, руль артында йокыга китеп, машинасы белән аварияга юлыга да инде Илнар. Чөнки төнлә йокламыйча бала караган була. Ярый машинада үзе генә була әле. Үзенең ике аягы да сына. Машинасын сафка бастыру өчен бик күп акча кирәк булачак.
 
Хәзер Илнарның бер яшьлек кызын әнисе тәрбияли икән, хатыны шул китүеннән бүтән күренмәгән.
 
Сүз ахырында, Илнар миңа текәлеп болай дип сорап куйды:
 
- Менә сез олы яшьтәге кеше, тормыш юлы узып, күп авырлыклар да күргәнсез. Әйтегез әле, миңа алга таба нишләргә? Ничек яшәргә?
 
Бу егетнең сорау тулы күзләренә карап, аптырап калдым - нәрсә дип тә җавап бирергә белмәдем. Әйе, тормыш туктап тормый, алга бара.
 
Илнарның яшьлек еллары узган инде. Ләкин ул үз юлын акларлык, үзен яхшы яктан искә алып сөйләрлек берни дә эшләмәгән. Тик аның бит әле яхшы әти булып кызын үстереп, тормыш юлына чыгару мөмкинлеге бар! Шулай ук үзен үстергән әнисенә булышып, аны тәрбияләп, аның сүзен тыңлап яшәргә дә соң түгел бит!

Муса АБДУЛЛИН 
Себерке

Алга таба ничек яшәргә: хатыны баласын калдырып китә, үзе ике аягын сындыра

Тулысынча укырга

На сайте ведутся технические работы.